Bunita cobertura di prensa peruano tocante e ciclista Arubano Cherley van den Linden

Bunita cobertura di prensa peruano tocante e ciclista Arubano Cherley van den Linden

9-10atletanaperu-2

E delegacion di Aruba cu a caba di regresa satisfactoriamente for di e prome Weganan Suramericano Hubenil, no a bin cas bek sin a laga su marcanan atras na Lima, Peru. Den prensa peruano nos a haya un bunita relato di e ciclista Arubano, Cherley van den Linden, kende den e competencia “careda contra holoshi” a sa di yega na prome lugar, dilanti paisnan poderoso den ciclismo manera Brasil, Ecuador, Colombia, Argentina, Venezuela, etc. Manera e corantnan peruano a scirbi: “La ciclista de Aruba fue la mejor en esta prueba en los Juegos Suramericanos de la Juventud”. Un logro cu e dia ey tabata topico di combersacion den e circulonan di ciclismo.

E atleta Arubano, Cherley van den Linden ta gana e competencia di “careda contra holoshi”, marcando un tempo di 5:05:12, e coredor di Brazil, Ana Paula Casetta a yega na segundo lugar cu un tempo di 5:06.35, mientras cu e ecuatoriana Ester Galarza a keda na di tres lugar cu un tempo di 5:07.36 minuut. Manera nos a bisa anteriormente, e participantenan na e Weganan Suramericano Hubenil ta hobennan entre 14 y 16 aña di edad y Cherley van den Linden di Aruba a sali na prome lugar dilanti di paisnan cu a competi manera Argentina, Bolivia, Brasil, Colombia, Chile, Ecuador, Guyana, Panamá, Paraguay, Perú, Surinam, Uruguay y Venezuela.

Pa e ciclista Cherley van den Linden y Aruba completo esaki sigur tabata un momento masha bunita mes cu ta yena nos cu orguyo. E cobertura den prensa peruano ta uno impagabel pa e deporte di Aruba. Un atleta cu ta bini di un isla cu apenas 100 mil habitante ta bin gana paisnan grandi unda miyones di hende ta biba. Aruba mester ta super orguyoso di e atleta Cherley van den Linden y nos tin sigur cu den futuro cercano nos lo tende mucho mas di e hoben prospecto aki. Pabien Cherley!!

Pa esnan cu kier mira e link: http://www.tuteve.tv/noticia/deportes/175635/2013-09-24-cherley-van-der-linden-gana-el-oro-en-ciclismo-contrarreloj?

2017-04-06T11:12:18+00:00 October 11th, 2013|